Our Blogger Templates Web Design

فى مدونتى المتواضعه ارحب بكل الزوار وكل الاصدقاء وياريت تعجبكم كلماتى البسيطه واشكركم جداااااااااااااااااااااااااااا لتشريفكم

كلام في الحب


يا شمس تعالي دفي لحبيبي طريقه

وانت يا نجم أمانه في الليل تبقي عشيقه

وان طلب حبيبي نور

امانه يا سما

توصي نجومك تبقي نوره وبريقه

يا ليل يا مجمع العشاق

يا حاضن السهرانين

زيدنا كمان أشواق

واروي العطشانين

دا الحب بيحكوا عليه

وكتير كلام بيقولوه

لكن اجمل معانيه

كل الحبيبه سمعوه

الحب يعني ضل

الحب يعني دفا

الحب يعني قمر

ينور في ليله صفا

الحب يعني قرب

ما يعرف طعم الجفا

وانت في حاله حب

جرح قلبك اختفا

الحب يعني نار

في قلب كل هاوي

الحب دا اصرار

ولازم تبقي ناوي

الحب دا بركان

يهز قلب الحبيب

يعني روتانا زمان

وشغل العندليب

الحب يعني هوا

وجراح في قربه تطيب

الحب هو الدوا

وصفه كل طبيب

عرفت معني الحب

ياريت تقول حبيت

هحبك بس بشروطي


هحبك بس بشروطي

ومراكبك هترسي ع شطوطي

هقول للناس بحبه

وهقولها بعلو صوتي

يا أول حبيب في حياتي

علشانك تبان ضحكاتي

بحبك بكل ما فيا

وهعيشلك عمري الأتي

بس شروطي وافق عليها

وبنود حبي ارضي بيها

خليك معايا واحده واحده

وقصه حبنا نبتديها

عيزاك كده واد رومانسي

من أولها تفهم درسي

خليك معايا في طريقي

مش تمشي في طريق عكسي

نركب سفينه غرام

وهناك يحلي الكلام

وتتوه يا حبيبي في عنيا

م الشوق وم الهيام

وكمان عيزاك حساس

تعيش ع مبدأ الاخلاص

تكون صادق في حبك

مش بتحب وخلاص

وعيزاك تكون غيور

واد كاجول أمور

أشاور عليك للناس

وأقول اجمل عصفور

انت جينتل وشيك

دايما العين عليك

بتديني المحبه

وأنا م الحنان أسقيك

شروطي أه حنينه

وأدي العينه بينه

لما تقرب أكتر

تلقا الهنا عندنا


خواطر


مش بتعرف غير تبقي أناني

تسبني قلبي وحداني

تعيشني في دنيا غريبه

وفي حيره ودموع من تاني

تفرح لما تشوف دموعي

وتستني لحظه رجوعي

وتخطط في جرح جديد

يهزمني ويطفي شموعي

كنت باديلي بقلب طيب

وحبك كان مني قريب

اتاري حبك اكبر غلطه

واكتر حاجه تتعيب

يا اول كدبه صدقها قلبي

اندم عليك لا وربي

انت حد ميستاهلش

أسلملوا ولو مره حبي

انت يا أناني راحت عليك

وبكره بعادي هيبكيك

لأنك خلاص خسرتني

شوف بقي مين يداويك

خسرت قلب اشتراك

وكتير كان بيستناك

وقدرت ابعد عن قلوب

واختارت بس هواك

بس عارف انا سعيده

لاني بقيت في دنيا جديده

دنيا انت مش فيها

وهعيش لأني عنيده

ومسيري هسمع اخبارك

وهشوف عذابك ونارك

وصدقني هفرح بألمك

وتدوق طعم اختيارك

استراحه

بجد انا زعلانه اوي لأني بشيلكم همي
وتعبتكم معايا
حزني بجد غصب عني مش بايدي
قولت اخد استراحه شويه
ومش عارفه هرجع تاني ولا لأ
مش عارفه هتطول ولا ايه؟
لاني بجد أكتر انسانه حزينه علي وجه الأرض
بجد مش عايزه اسيبكوا او ابعد عنكوا ابدا
بس الحزن تعبني اوي وأثر عليا
حياتي وحشه أوي
بجد بحاول كتير جدا افرح وانسي حزني واخرج نفسي من همي اللي بقي عايش جوايا
بس كل ما أحاول تيجي حاجه تمنعني والقا الحزن يسكن قلبي من جديد
مع اني لسه صغيره لكن مش عارفه ليه حظي قليل اوي
كل حاجه حلوه مبقتش ليا
بجد تعبت أوي
انا لو جبل شاف اللي شوفته كان نطق
متزعلوش مني لو اتأخرت عن مدوناتكوا
بس صدقوني غصب عني
مفيش قدامي حل تاني
غير اني ابعد عن كل حاجه
واشوف الدنيا هتاخدني لفين
وهتعمل فيا ايه
بس ابقوا افتكروني
لو مرجعتش تاني ليكوا
وانا عمري ما هنساكوا
مهما حصل
ومهما الزمان اتغير


سلام يا أرق صحبه في الوجود

سعادتي معاك


يللي حياتي احلوت بيك

وسعادتي لقيتها باديك

وحنان العالم في قلبك

أيوه خطفني رمش عنيك

يللي الدنيا في قربك جميله

وأفراحي هبتديها من الليله

وهأسطر بايدي كتابي

السعاده بقت مش مستحيله

يللي معاك بنسي الناس

بكام كلمه وكام احساس

بنسي المر وأساه

فاكره اني بحبك وخلاص

يللي حضنك هو بيتي

يا أوجاعي خلاص خفيتي

وانتي يا عنيا ارتاحي

دوبتي كمان وهويتي

يللي اسمك جوه مني

حبك بقي بيجري في دمي

بتولد لحظه ما أشوفك

من حسنك بصلي وأسمي

يللي في عينك شفت الجنه

ودي أكتر لحظه أنا بتهني

أيوه حبيبتك وانت حبيبي

يلا بقي اطلب واتمني

حبي ليك



لو تسمع دقات قلبي

هتحضن قلبي في ثواني

لو تحس بشوقي ولهيبي

هيحلا في عنيك زماني

بسمع كلامك أفكر

وأشوفك يا حبيبي أسرح


يا روقان كل متعكر

خليت قلبي يفرح

خلتني أنسي اني

كنت بدوق الويل

يا ساكن جوه مني

يا أبو قلب طيب جميل

الثانيه في بعدك سنه

بتعذب وبقاسي فيها

وقربك هو الهنا

وعنيك الدفا ماليها

جوه عنيك يا غالي

بشوف فرحه عمري

بسهر ليك ليالي

وأوصي عليك قمري

بحب فيك رقتك

وبدوب أنا فيها

وجمال كمان ضحكتك

بحكي للناس عليها

حبك خلاني أتوه

واغرق في بحور هواك


وأقول لعيوني هاتوه


أكمل الفرحه معاك

بحس أنا بالأمان

وأنا في حضن قلبك

وبشوف نفسي سعيده

علشان يا جميل بحبك





دنيا


هي كده مهما عملنا

عمرها ما هتسيبنا في حالنا

دايما راح تملانا جراح

وتهدد مستقبلنا

هي كده دنيا حكايه

الغدر بتمارسه هوايه

والظلم أخداه ليها غايه

تهدم بيه كل أمالنا

احنا بجد صحيح مساكين

في بيوتنا وبنكون تايهين

بنصاحب أجدع خاينين

وننسي اللي ضحي علشانا

ما احنا اللي جبناه م الاول

لما سبنا الجرح يطول

والحب في قلوبنا اتحول

لدموع هزت كل كيانا

احنا اللي جبناه لروحنا

ما عرفناش نداوي جروحنا

بقي الحزن دلوقتي دابحنا

ومن مر الزمان أكلنا

هي كده دنيا فتوه

أخده كل شئ بالقوه

مبقاش فيها خلاص مروه

ودي قسمتنا ودا قدرنا


عذابي وحيره قلبي


عايزه ابعد عن كل الدنيا

لاني ملقتش فيها راحه

كرهت كل حياتي

ويئست وبصراحه

مبقتش عارفه اعيش

يا مر الزمان متجيش

يا قسوه سكنت حياتي

خلتني خلاص مساويش

يا خوف ملا حبي

بعد ما راحو حبايبي

بعد ما سابوني

أنزف انا وقلبي

طول عمرك يا قلبي حزين

بتقاسي ومش عارف مين

مين يا قلبي حبيبك

ومنين مر السنين

وانتي يا عيوني

حبيت الدموع فيكي

انجرحت ودي قسمتي

ولو كان يا عيوني يرضيكي

تعيشي باقي الحياه

ودموعك سبقاكي

وكل كلمه أه

هتبقي هي دواكي

الزمن وخلاص فهمته

وعرفت ايه نصيبي

موافقه انكوي بناره

ومبقاش حد حبيبي

عمرك يا جروحي ما هتطيبي

ولا يا دمعه عيني هتغيبي

ولا يا قلبي هتتهني

هتعيش دايما في نار

مش قادر تطول الجنه

حبيت بجد عذابي

وانا في عز شبابي

يا هم الأيام تعالا

هفتحلك أوام بابي





فرحه قلبي


رد ليا ابتسامتي

اللي كانت ضايعه مني

وبعد حيرتي وهزيمتي

رجعت من تاني أغني

بعد ما قولت خلاص

مش هأدوق الفرح تاني

جاني أغلي الناس

بكلامه هز كياني

هو حبيبي ونور عيني

والأمل اللي بعيش عليه

رقه حنانه بتحييني

وهأغني كام غنوه ليه

يا حبيبي قرب مني

واحضن قلبي الملهوف

متبعدش عيونك عني

مهما كانت الظروف

برتاح في حضن عنيك

وبنسي مرار الايام

وبتتولد وأنا بين ايديك

أجمل معاني الغرام

سبني أحبك وأدوب فيك

وأفرح قلبي الحزين

ويا كل عمري أدفيك

برموش العين

سيبني أتعلم من هواك

ايه معني الغيره

احساسي وأنا وياك

مشاعر حب كتيره

عشقك عايش جوايا

ومع الايام بيزيد

وهبتدي الحكايه

بشموع فرحه تقيد

مع كل دقه قلب

ومع كل نبره حنان

بيتوصف الحب

بورد في اجمل بستان










قلبي يا مسكين


ازاي بعد قلبي ما اتظلم

جاي تقولي استحمل...

جاي ومعاك ليا ألم

وازاي اوافق أكمل

ازاي علي نفسي ارضي

احب حد خدع فيا

عاملني بطريقه

في منتهي الانانيه

كنت بوهم نفسي

بحب منه كتير

كان واصفلي حبنا

زي الفراش بيطير

يطلع للسحاب

ويغيروا العاشقين

اتاريه ناوي ع العذاب

وعيونه كمان كدابين

كان لما يبص لعنيا

ميهمنيش ايه فيا مجروح

اتاريني في ايديه ضحيه

وباقيلي ثواني وأروح

أروح مع اللي راحوا

وقال كنت عايشه في حب

ازاي عيوني يرتاحوا

وتعبان بزياده القلب

ازاي أبدأ مشواري

بموت لروحي وقلبي

وليه أقبل ناري

قويني ياربي

متنزليش يا دموعي

انت غاليه أوي

خلاص هقتل خضوعي

وضعفي بزياده أوي

هغير من طريقتي

الحنونه البريئه

هتعلم ابقي انسانه

عنديه وجريئه

اعرف اواجه ظلمي

وارفض انكساري

ابتدي أقول لأ

بعزيمتي واصراري

اكون اقوي من الزمن

واقوي من الايام

ابيع المخادع وانتصر

وكفايه بقي استسلام

قعدت لوحدي مده


قعدت لوحدي مده

افكر في حالي وأقول

حبيبي بناري ليه يرضي

ويخلي الليل عليا يطول

ايه ذنب قلبي معاه

سلمتهوله بسهوله رماه

وعطف قلبي أوام نساه

وايه حصل مني

علشان يبعد عني

ويخلي الدمعه

توجع عيني ونني

اكمني صارحته بالحقيقه

وكنت معاه الهاديه البريئه

وعاملته بمشاعري الرقيقه

خفت عليه من الهوا

وحميته واحنا سوا

واديته اجمل احساس

ومن حبي كمان ارتوا

نيمته جوه عيوني

ضللت عليه بالرموش

كان هو بس كوني

والقلب عنه مبعدوش

كان أهلي وكان ناسي

كان سبب تحريك احساسي

كان اكتر حاجه تفرح

طلع في الاخر ناسي

نكر عطفي وداس علي الحب

بدل الاخلاص بسواد القلب

هجرني بعد عذابي

خلاص هتضيع يا حب

قرر يتخلي عني

رغم انه كان مني

سابلي بعده ذل

والأه بعد ما أغني

دوقني كل المرار

نها بظلمه المشوار

حسسني انه مش انسان

لأ دا أكبر غدار

يارتني ما اتعرفت عليه

ولا عيوني ندهت عليه

ولا قلبي قربته منه

وبقي لعبه في ايديه

أيوه


ايوه أنا هبدأ أصحي وأفوق

وأطلع بقي من وهم الشوق

وأعرف ان مافيش مخلوق

يستاهل الحب في يوم

أيوه أنا هعرف ان الناس

فيها الفضه وفيها الماس

فيها اللي معندوش احساس

واللي لازمله بجد اللوم

أيوه حياتي عندي أهم

وروحي ليه أعيشها في غم

أيوه هخلي الفرح يعم

في قلبي وهزيل الهموم

أيوه أنا هبدأ صفحه جديده

عمري ماهبقي في يومي وحيده

وأفراحي هخليها عديده

وحياتي ولا فيها غيوم

أيوه حياتي هتبقي كتاب

فيه هختار كل الاحباب

وعمري ماأدق في يوم علي باب

الحزن وأخليه ما يدوم

اجيب منين الدوا


أجيب منين الدوا

حزينه والله يا عيني

يامراكب الهوا

لفين هتوديني

يامرسال المحبه

مش بتدق ليه بابي

اسقيني من العشق حبه

أنسي بيهم عذابي

ياسفينه غرام

ماشيه في بحر الشوق

اديني ولو جرام

حب علشان أدوق

يادنيا يللي معنداني

ياحظي يا قليل

اشمعني قلبي وحداني

تايه بين سواد الليل

قلبي اللي شال هموم

ميستحملهاش بشر

انضرب بخنجر مسنون

والوجع فيه انتشر

يوماتي تنزف يا قلبي

وليه أجيب علاجك...

ماخلاص اتقتل فيك حبي

وخنجر مين اللي صابك

عيش ياقلبي واندبح

وانتي ياعيني دمعي

خلاص موافقه أنجرح

ومش هقول يا حنيه ارجعي

ذنبي ايه


ذنبي ايه

اني عايشه في الدنيا

البريئه الطيبه

وان يوم زعلتني

بكون منك قريبه

اني بخلص

واخلاصي دا من غير تمن

تقسي علي قلبي

انت كمان والزمن

اني أعيش ملك لاديك

تطلب حبي في ثواني أديك

وتكافئني بغدر قلبك

ويبقي موتي وأنا جنبك

جتني يوم وطلبت مني

اني أبقي ليك حبيبه

شبكت نفسي وغصب عني

بانسان ميعرفش طيبه

كنت باديلي بوش هادي

وأنا من حناني اتخدعت فيك

بقي في غدر للدرجادي

الهدوء مش لايق عليك

فتحتلك قلبي وبابه

وطويتك بين ضلوعي

كنت لقلبي عذابه

وطفيت باديك شموعي

كنت لك سكنك ودارك

ونسك ونورك وبردت نارك

كنت بزعل من قلبي

لو يوم ماجاش زارك

وانت جرحتني وبكل قوه

كأنك أكبر فتوه

طلعت بجد شاطر

معملتش لقلبي خاطر

بس أنا زعلانه لأنك.....

قولت كلمه ومش عارف معناها

كلمه سمعتها منك

وفي ثواني قلبك نساها

عارف معني ( بحبك ) ايه

انك تسامح وتصون بجد

تاخد حب تدي حب

يكون الاخلاص في دمك

تتنادي بيه مع اسمك

تكون عايش وهدفك

تحمي حبيبك وبس

تسعد قلبه الحزين

تغطيه برموش العين

تعلا دقات قلبك

زي كل المحبيين



حرام يا دنيا


ليه يا دنيا معايا غبيه

بتذليني ومفتريه

بقيت أول ضحيه

واعلني يالا خبر انتصارك

مفيش قوه ادافع بيها

الدنيا سجناني والبركه فيها

بتحسب كام خطوه بمشيها

وان اتكلمت يقولوا اختيارك

مش بايدي أغير زماني

لكن مسيري أبدل حناني

ولازم اقول الحق

ويبقي علي لساني

وانت ياقلبي خد قرارك

اتظاهر انك شجاع

وحش في الدنيا طماع

ليك صوت وبتتكلم

وكلامك للناس يتزاع

أنا عرفاك ياقلبي خجول

صابر علي الذل وحمول

يائس بس مش بتقول

وايه جزاءك بيتلعب بيك

الناس والدنيا معيشني

في الأه ومخليني

أنام يوماتي وانا ببكي

وفي همي لنفسي بشكي

ولا حد واحد حاسس بحالي

بتقتلني الوحده

وبتحمل ومغلوبه وساكته

ونفسي يرتاح بالي

يادنيا حني عليا و لو ثواني

حرام عليكي دا العمر فاني

ونفسي اعيش متهنيه

اتعرف علي السعاده
وتتعرف عليا

واحس اني انسانه

عايشه علي مبدأ الحنيه

أيام زمان


زمان قولنا كلام

بس كنا صغيرين

كان بدايه الغرام

وأول الحنين

بدأت وقولتلي

الاعجاب شاددني ليكي

وفي ثانيه حلفتلي

هأعيش بين ايديكي

كذا يوم ولقيتك

بتقوللي انا بحبك

وانا كمان حبيتك

وسيطرت علي قلبك

وحلفت انك هتفضل جنبي

مهما كانت الظروف

وهتضحي علشان حبي

وبكره الدنيا هتشوف

ان الحب لينا

ومعانا في كل مكان

والشوق مالي عنينا

مدفي علينا المكان

ومهما انا وانتي اختلفنا

هيكون التسامح وسيلتنا

ومافيش قوه تهد حياتنا

وهنبني بفرحنا بيتنا

وقولت انك شايفني

عصفورتك ولابسه طارحه

والشوق هو اللي زاففني

وقلبك ملياه الفرحه

بتحلم تشوفني بفستان

ابيض بلون النهار

وتاج عزف وألحان

اللي انا فيهم اختار

ويدق الطبل بابنا

وعيونا من الفرحه ترقص

ويشاركنا كل اصحابنا

ومن افرع الفل نلبس

يارب يا حبيبي

نكمل كده الحياه

وتكون من نصيبي

وحلمي وحلمك نلقاه

غبت عني


غبت عني حسيت كأني
روحي سابتني وايه العمل

سمعت صوتك وغصب عني
فرحت أوي ورجع الامل

مش قادره اعيش من غير
ما أشوفك ولو ثواني

ولما شفتك وريحت قلبي
ليه بعدت تاني

ليه مُصر تجرحني
وتزود دايما أحزاني

دأنا لهفه قلبي وشوقي
ليك بيبان عليا

وانت ليه ياروح قلبي
مش حاسس بيا

نفسي ابقي زيك
هتعلم منك غدر وأسيه

لكن مش عارفه ليه
بضعف أوي قدام عنيك

وليه بحبك بجنون وشوق
ليه دايبه فيك

لكن هحاول وأقوي قلبي
وما يحس بيك

اخر وداع


هودعك أخر وداع

واكيد عارف مين اللي باع

هودعك بنظره هاديه

فيها معني الحب ضاع

أول لحظه في لؤانا

كانت عيونا حزانا

وحاولنا مره نفرح

اتغلب علينا بكانا

بحبنا قولنا نداوي

أي جرح كان لينا ناوي

هم الدنيا ملا قلوبنا

وكان كلامنا مجرد حكاوي

كان الزمن بيلعب بينا

واحنا قولنا هنحقق أمانينا

طلع الزمن غدار اناني

والفراق مكتوب علينا

هودعك بكام سؤال

ليه الفراق كان احتمال

ليه كل حاجه حلوه

مرسومه لكن في الخيال

ليه لما العين بتهوي

بكاها بيبقي أقوي

دموعها بتصاحبها

ومحدش يقول دي تسوي

ليه الحياه عذاب

دايما فراق احباب

وقت الراحه محسوب

وطريقنا كله صعاب

ليه الحب نار

الم خوف ومرار

رعب ساكن القلوب

ودايما عقلك يحتار

كفياني اسئله

محلوله المسئله

هنضيع مانضيع

ودي بدايه مشكله




عندما تعشق انسان


عندما تعشق انسان

معه تشعر بامان


ويبتسم لك الزمان


ويملأ قلبك الحنان


عندما تحن العيون

وحبيبك ينير الكون


ويرتاح صدرك بجنون

فتسأل نفسك من أكون

انا التي ابتسم لها القدر

انا التي ترتوي من النعيم


عندما يهوي القلب


وتعلا دقاته


وتشعر بأنك تحب


وأنك لحبيبك حياته


فما أروعه هذاالاحساس


وما أحلاه


فأشهدوا أيها الناس


بأن عيناي سكناه


فمهما طال عمري


سيظل علي بالي

سأظل أتذكره


ولأجله اسهر ليالي

فلن أرتاح يوما


بدون النظر اليه

فأحن له دوما


وأعشق السؤال عليه


برؤياه أعيش في حب


وينتعش القلب


ويزداد ويرتفع النبض


فله تأثير قوي


يشغل تفكيري

يخلص له ضميري


تحن له روحي


فهو وردي وعبيري



حبيت


حبيت وزارني الهوا

وسكن فؤادي

قلبي من الحب ارتوا

فرحان من الليلادي

ياعيوني يا سهرانه.......

نامي وارتاحي خلاص!

نسيت سنيني الحزانه......

بكام كلمه اخلاص

ياقلبي ياطيب......

الحب نادا عليك

كان منك قريب

دلوقتي ملك اديك

الحب بقي في وريدي

واخترق الشرايين

يافرحه عمري زيدي.....

زودي فيا الحنين

مش هقدر أداري حبي.....

اللي قاد في القلب نار

ولا عن حبيبي أخبي.....

انه اجمل اختيار

أاحلي هديه جاتني

من صغري وأنا بتمني

يكون لي أخ حنون

وحياتي تبقي جنه

بحنانه اللي يملا الكون

وكتير دعيت ربي

يارب العالمين

ارزقني بأاخ شبهي

طيب وصادق ورزين

فاستجاب قوام دعوتي

وهداني أحلي هديه

اخ خلا دنيتي

جميله في عنيا

بيتميز بطيبه قلب

نادر وجودها في الزمان

ودي نعمه من عند الرب

واهبهاله لأنه انسان

بحكيله وبستني منه

نصايحه المفيده

ودا كمان لأنه

أخلاقه حميده

بتمناله الصحه

وبتمناله الخير

وأوقات الفرحه

تزيد وتبقي كتير

وأي حلم بيحلمه

يتحقق باذن الله

وعمر عيونوا ما يندموا

علي شئ راح منه وتاه







اللي بنيته اتهد

لما الزعل يبقي بجد

علي كل اللي بنيته واتهد

هتبقي حزين ....

لما تملاك الجراح

لما تبكي ع اللي راح

بدموع العين ....

لما يكون اللي غشك

أقرب واحد في وشك

وعلي الجانبين ....

مش شايف في الدنيا غيره ....

خدعك هو وكتر خيره

علي الجرحين ....

جرح قلبه لقلبك هداه

وجرح حبك اللي رماه

وفي الحالتين .....

هتلقي سكاكينه مسنونه علشانك

ودي مقابل عطفك وحنانك

مقابل الحنين ....

لما يكون اللي سابك

اللي علشانه قلبك جابك

تشكي لمين ؟

ومفيش علاج ولا في دوا

يقدر يداوي جرح الهوي

طول السنين ....

تندم تبكي مش هيفيد

لازم تظهر بشكل جديد

كل يومين ....

هيحس هو انه ضعيف

وانه خلاص بقي ليك ضيف

زي الباقيين ....

وبكده هيكون للدرس اتعلم

وهيفضل علطول يتألم

والناس شايفين !

شايفين كسره نفسه وناره

بعد ما علي غدره ومراره

كانوا شاهدين ....

فابعد بقي عن اللي خانوك

ودور علي ناس حبوك

وبعمرهم ليك واهبين ....

اللي الغدر عمره ما عابهم

ابدأ دق قوام علي بابهم

صدقني هيكوني فاتحين ....

هتقول ليه الباب مفتوح ؟

هيقولوا كنا لحبيب الروح

مستنيين !




هاحط حد


هاحط حد

وأفوق بجد...

وأخلص روحي من حب وهم

من قصه طويله ماكنتش فيها
ولا مره شهم

لكن بغدرك رميت في قلبي
كام ألف سهم

جرحوه كفايه وكانوا البدايه
لعذاب كبير

بانت حقيقتك وبان معاها
موت الضمير

وبان كمان علشان أحبك
شروط كتير

عدم الخيانه لما تخون

رضي بالاهانه وحب بجنون

وأضحي ليه علشان عيون

لاتعرف تحب ولا تصون

بتخدع في قلب طيب حنون

لكن دلوقتي هصدر قرار

وأخلي قلبي له الاختيار

انه يكمل وفي يوم ينهار

ولا يقوي ويكون جبار

ويسيب قلب حبيبه محتار

لا طايل جنه ولا حتي نار

وانا عارفه قلبي ناوي علي ايه

هيسيب حبيبه ويجرح فيه

ويبيعه لكن هيسأل عليه

ويعرف عملت ايه الدنيا فيه

داق المرار زي ما دوقه

ولا الصدمه هتفوقه

ويلاقي نفسه انسان جديد

وقلبه يلين بعد الحديد

لكن ساعتها هيكون وحيد

وهيعرف ليه

هأحكي حكايتي

هأحكي حكايتي آه ...

وقصتي الجميله

أد ايه لذيذه الحياه !

بأغاني كل ليله

لو شفت حبيبي يوم !

وكنا ساعه مغربيه ...

تفكيري فيه يدوم

والنوم يطير من عنيا

وأسهر طول ليلي أغني

ويسمعوني اخواتي ...

أنا منه وهو كمان مني

ما هو بلدياتي

وأقول امتي يجي النهار !

علشان يصبح عليا ...

لو غاب يجيلي انهيار...

وأرفع عليه قضيه

وأقوم له أرق محامي ...

وهما عيوني البريئه

ياعيوني اوعي تنامي !

قبل ظهور الحقيقه

ويتحدد ميعاد الجلسه

فأوصي عيوني عليه ...

تقوللي أنا بيكي حاسه

وحاسه برعشه ايديه ...

قولتلها يطلع براءه

ويدخل قوام في قلبي

ردت بكل جراءه !

سمع وطاعه هألبي

ويحكم القاضي لصالحه ...

ويخرج زعلان شويه !

وأنا عليا أصالحه

ما أنا اللي رافعه القضيه !

حاجه شغلاني

امبارح كنت بفكر ...
في حاجه كتير شغلاني
لو بعدت عن حبيبي ...
في البعد اكيد هيعاني ؟
ولا علي بعدي هيقدر !
وهينسي ذكرياتي
وهيفرح فوق ما أتصور
وهيفقل كتاب حياتي !
هينسي كل حلم جميل ...
حلمناه سوا !
وكل آه وويل
هيلقالهم دوا !
ولا هيخيب ظني
وهيسرح في جمالي
لأنه حته مني
وقلبه في يوم صفالي
بس ياخوفي من الزمن ...
ليقسيه علي قلبي
ويبيع من غير تمن ...
أنا وذكريات حبي
لو بس الزمن يسألنا
ويسمع منا الجواب ...
كان يرأف بحالنا
كنا نمحي العذاب
كنت بجد هأقول ...
ربي شاهد علي حبي ليه
ومهما العمر يطول ...
مش هاكون غير ليه



كلام في الحب


قاللي حبيبي أحلي كلام في الحب !
كلام دوب في لحظه القلب ...
عشقي ليه أيوه كتير ...
أول ما اتقابلنا !
وبالنظرات اتبادلنا !
حسيت اني معاه بطير ...
حبه حلا سنيني
جاب السعاده لعيني
وأنا شيفاه بكون بخير ...
لو شفته من بعيد !
بشتاق لعيونه اكيد ...
وأما يقرب مني
والايد تلمس الايد
روحي تروح مني
ودقات قلبي تزيد ...
قلبي يدق مليون دقه
وكل دقه اسمه فيها
حبيبي جمال ورقه
وحنيته بشتاق اليها ...
لما باسمي بينادي !
بعشق كل الحروف
وهوواقف قصادي
قلبي عليه ملهوف ...
عاجبني فيه كسوفه
ولون خدوده لما يقابلني
ده اللي من أول ما أشوفه
بسحره قوام يشبكني ...
خلاص مش هداري !
ده قلبي مال اليه
هقوله انه اختياري
ومن دلوقتي أنا كلي ليه ...


يامهجه قلبي


يا مهجه القلب دع الحب يفعل ما يشاء !
بقدره من الله يشفي من كل داء ....
يجري حب في دمي باستمرار ....
تعالا سويا كي نبدأ المشوار
ونغوص في بحر من الاشواق والحنان
ونزرع الحب في القلب لا علي اللسان
ونحيي الحلم والأمل من جديد
وحبنا يوصف بالطير الشديد !
طير يغرد فرحا بنا ....
ويغني وينشد هنا
ويمحي حزن من قلبنا
ويبقي الحب والود لنا ....

الزمن غدار


الزمن غدار وناره بتكويني !
وخلاص دمعتي مش بتفارق عيني
زمان أه مسحتها ...
بس جه خلاص وقتها
وبجد مافيش مفر
ولا أي حاجه تسر
زمان زرعت ورد !
وسقيته في عز البرد
وجيت علي نفسي كتير
وايه المقابل كدب ...
قطفوا الورد أخدوه
وفي طريقي الشوك رموه
وخطيت أنا عليه
وارتاحوا وقلبي جرحوه
ياما قولت أنا نفسي أرتاح
كأني بقول يا جراح
كأني بودع كل الحب
وبموت كل الأفراح
ايه ذنب قلبي الغلبان ؟
أعيشه في الاحزان
ليه الدنيا قاسيه عليا ؟
سارقه الراحه من عنيا
بسا سمها في كل ما فيا
حرماني من لحظه حنيه
وسيباني وحدانيه
بعطش كل يوم
مش بلاقي نقطه ميه
بشرب نار في نار
والنار بتحرق فيا ...

قولت


قولت أتقل عليه
قاللي ارحمي عنيا !
فكرت أسأل عليه
قاللي ابعدي شويه !
أعمل ايه معاه ؟
وأرضيه بأي نوع !
أروح وأبعد وأنساه ؟
هيطلب مني الرجوع
أحبه وأدوب في هواه ؟
هيقوللي لأ ممنوع
كلامه سيف علي رقبتي ....
أصله عندي الهوا
ضحكته هي حبيبتي
كل شيئ يهون واحنا سوا
بصبر كمان عليه
ماهو بيدلع عليا
معرفش أجرح عنيه
بس هو بيجرح عنيا ....
بعدت عنه
بس مش مرتبه لكدا ....
وأرجع اقرب منه !
من غير محيله ولا ندا
هو بقي بيغيب
وبيعذبني كدا معاه
رغم انه الحبيب ....
وعمري كله فداه
بيبعد عني وأنا
بسأل عليه الناس
بتمني يجيلي هنا !
أطمن عليه وخلاص
بعمل بأصلي معاه
منا أصلي مليش غيره
تاعبني جدا هواه !
بس بسيبه لضميره
في قربه بحس الأه ....
بس هأعمل ايه !
في بعده بتبقي الحياه
ملهاش طعم ليه !
حيرني وسهر عيوني
وهو أكيد فرحان
الدموع قتلت جفوني
ولا يوم يكون زعلان ....
أختار ايه دلوني ؟
نفسي قلبي يرتاح
واياكوا تعذبوني !
دا قلبي عايز أفراح

شئ هام


كان عندي شئ هام ....

اتولد ... كبر في عام !

عام الحب والانسجام

واليوم دا من احلي الايام

حتي النايم من الفرحه قام !

وبقي كله في صحه تمام

وأنا وانت الشوق في عيونا دام

وهيكبر علي مر الأيام

الحب جوه روحنا ....

والزعلان منا سامحنا !

وحبنا خلانا .... كأننا في يوم نجاحنا !

زي عصافير الجنه الفرحانه

بتشاركنا وتحملنا أمانه ....

نخلي الفرح دايما معانا ....

ونزيل أوهام تعبانه

اسفه


أنا اسفه بجد اني قلت عليك انسان !

اسفه انك مني حسيت بالحنان !

اسفه لما صدقت كدبه من فتان !

كدبها عليا .... ومثلها بيا .... وفي الاخراج فنان

جرب تمثل .... اعمل مسلسل ....أو كذا اعلان

مثل دور شرير أوي ....أو حد خاين ملوش أمان

أو اعمل دور شاب طيوب

من كتر الطيبه مليان عيوب

مع كل الناس عاشق ولهان !

ولا اعمل فيلم عنوانه

سقط القناع وظهر الجبان

ودا طبعا مش جديد عليك....

دا طبع من صغرك فيك

ما قدرش يمحيه الزمان

اسفه اني قلت انك

واد شهم ومفيش منك

وكنت بتعب في بعدي عنك

أتاريه نعمه من الرحمان

كنت بقول عنك مواويل

كنت بقول دا ملوش مثيل

اه انت طعم وجميل !

بس لازم تبتدي مران

تتمرن ازاي تحب ؟

ازاي تعرف تقدر قلب

حبك وفضل سهران؟

مقدرش أنكر اني بعاني

مش علشانك لأ علشاني !

لأني بعت واحد تاني

كان حبيبي من زمان

لماذا أحببتك


أن الأوان لتعرف لماذا احببتك ؟
أن الأوان لتعرف بماذا سميتك ؟
سميتك بالحنون في وقت قسوه من في الكون
سميتك بالوفاء في وقت غدر الأحباء
أطلقت عليك محبه وقت العداء
ولكني فزعت من حبي !
وخفت من بحور حنانك !
ولذا أمرت قلبي
ينساك فأبي نسيانك !
فتركت الفراق لأنني أشتاق
لرؤيه من يكون حامل لقلب حنون
أشتاق لأجمل عيون
لمن هو أقرب لعيناي من الجفون
ويزداد اشتياقي في وقت التلاقي
فحبنا باقي ......
فقلبي يدق عند رؤياك
ويتعهد دوما ألا ينساك
واحساسي بك لا بسواك
وعرفت بأني لك لائق
فهيا نعقد الوثائق
ألا نعكر ما هو رائق
بلا حبنا فهو ليس بشائق
ولنشبه القطار والسائق
فراقهم ليس له أصل
ونصنع ضد الكره مصل
نتناوله ليوم الفصل

عندما تحب انسان


عندما تحب الحياه من أجل انسان
عندما تعيش سعيدا لسعده الان
تشعر بأنك رسم بقلم فنان
بأنك طير وورد بستان
يملأ الحب قلبك وتعيش في امان
عندما تبوح لشخص بحب دام
وعندما يخبرك بأنك عنده هام
تلوذ وقتها بحلاوه الأيام
وتغوص دوما في عالم الأحلام
وتنفض ثوبك من ذل الأوهام
عندما تعترف بدقات قلبك
عندما تحب من أحبك
من ضحي بعمره لأجلك
ها هو الذي سكن عقلك
وذاق سعاده الأيام مثلك
في الوقت الذي تشعره فيه
بأنه عيناك وبروحك تفديه
وتأخذ بسمك لتعطيه
ومن بحور حنانك تسقيه
يترك العالم وحبك يغنيه
عندما تعيش في هناء
عندما يكون لك دواء
من كل مرض وكل داء
وتشعر اليه بانتماء
ويكون قدرك والقضاء
عندما....تحب انسان.....

الأماني المستحيله

عرفت أن الأماني ليست لي ب طريق
وأدركت بيد فاسده تملأ قلبي ضيق
وتذكرت الذي مضي والذي هو آت
من يستحق لوماً ومن ينجدني دوماً
فوجدت أن الهموم تملأ صدري بغزاره
وكمٍ من السموم في عيني يا للمراره
وآتت في ذهني أفكار لماذا قلبي أسير
فضاق صدري وانتزع فرحي
وتغيرت حياتي
فأصبحت دوماً للأسوء
لا أطيق الحياه لا أقبل العيش بها
أتألم وأبحث عن راحه لكن لا أجدها
لماذا الطيب يتألم ولا يعرف يعيش
أين طريق الرحمه
يا الهي يا الهي أعيش في جحيم
أفرح لا لا يوجد فرح
ذلت نفسي وقلبي حكم عليه
يعيش مكسور لا يذوق راحه
يعيش وحيد في دنيا خوف ورعب
في أيام دمار
تغمض عيني ذنب ترتاح وتنام خطيئه
يهدأ قلبي مرفوض
تمنيت أن أموت أن تنتهي حياتي
فأنا صوره فقط وأحيانا كثيره لا توجد
أسأل نفسي لماذا
لماذا التألم يصاحبني
أنظر في المرأه فلن أجد سوي ملامح
تخفي ورائها أوجاع تمنيت أن أصحي وأفيق
فأجد نفسي زهره نور جميل مضيئ
ولكن أنا كالغصن تحوطه الأشواك
أنا كالشيئ الجديد كلما استخدم يتجاهل
أنا كالورده كلما قطفناها دبلت
أعيش ولن أعيش
لا أجد أحد يساندني
أحلم بالاستقرار بالتفاؤل
لكن أين هما
أشعر بأني اداه تستخدم عند الحاجه
ولكنها فقدت فائدتها فتركها الناس
الكل يتجاهلني لا أحد يعترف بي
العالم يتعامل معي بكبرياء
يسخر مني يستهزء بحناني
فأنا معاملتي بالحب
والكل يعاملني بكره
بحقد بذل بألم بجرح
أدعوا ربي
أن يجعل في وجهي نور
أن يحميني من العذاب
لن تغمض عيني
أحلم بالتعرف علي السعاده
لكن لاأجدها
الخوف يقترب مني
وأن يتهني قلبي
فهذا المستحيل

قاموس مشاعر

قاعده مره ساعه عصريه
عازمه صحباتي علي غدوايه

قالتلي أعز صاحبه ليا
بعد الغدا تحكيلنا حكايه

قلتلها طيب تسمعي ايه
قالت حكايه القاموس

خلصنا أكل وحلينا
وقاعدين نشرب عرقسوس

قولت أنا هبدأ .....
في مره كنت قاعده حزينه .
وبسمع مصطفي كامل
فجأه جاتني هديه ثمينه .
بفتح لقيتها قاموس شامل

قاللي ليكي الزمن بعتني .
قولتله أحلي هديه جاتني
بس الأول أنا هسألك.
عن نوعك علشان أقبلك

قاللي قاموس احساس كبير.
فيا المشاعر وبتفسير
اي معني تحتاجيه .
والحزن علاجه هتلاقيه
ضحكت وقولت قال ياعني خبير
قال نسأل مانتتريقش كتير
قولتله ماشي !!!
قوللي الدنيا ياعني ايه ؟
قاللي الدنيا دي شبه غابه .
فيها قوي في وسط غلابه
فيها قسوه بتمحي طيابه.
دنيا غداره وقلابه
ساعه الفرح تقلب كأبه
قلت ومين هما الغلابه ؟
حد ماشي جنب الحيط.
مايعرفشي معني التنطيط
عامل نفسه لاهله بيت.
ولا ليه شهره ولا ليه صيط
قولت وايه معني الخيانه ؟
ياعني لو كان ليكي حبيب .
لقلبك كان أقرب قريب
يحب غيرك ومعاه يغيب .
لا يقول غلط أو حتي عيب
وايه معني الانكسار؟
ياعني قلب طالب فرار.
منهار وسبب الانهيار
ان حبيبه طلع غدار.
باع حبه وبدون أعذار
طب قوللي معني الظلم ايه؟
ياعني لو محبوس برئ.
والجاني باشا حر وطليق
ياعني لما تمشي صح .
فجأه تلقيك تهت في طريق
تقدر تقوللي الحب ايه؟
سكت القاموس ! قولتله سكت ليه
قاللي الحب أحلي احساس.
هتحبي نفسك من حب الناس
الحب يا بنتي ياعني الحياه.
أحلي بسمه علي الشفاه
الحب عارف طريق السعاده
وموصلك لمنتهاه
الحب علاج اللي فات .
من ظلم من غدر وأهات
الحب احساس يدي دايما .
مشاعر كتيره من سكات
بصيت لقيت صحباتي مزهوله
قولت دا القاموس وأنا مش مسئوله
قالولي طيب هدينا يا شاطره
قمت طلبالهم كوكاكولا