Our Blogger Templates Web Design

فى مدونتى المتواضعه ارحب بكل الزوار وكل الاصدقاء وياريت تعجبكم كلماتى البسيطه واشكركم جداااااااااااااااااااااااااااا لتشريفكم

قولت


قولت اعدي جرح قلبي
يمكن اكسب اي حاجه
قال عليا اعز حبايبي
ان اسلوبي معناه سذاجه


قولت اسكت ولو قابلني
حزن يوم في طريقي
بس الألم دايما كاسرني
والعذاب علطول صديقي


قولت أمشي من سكات
وأنا مجروحه بس أخبي
حتي قلبي لو مره مات
أنطق وأقول الذنب ذنبي

قولت أبكي ولا حد يسمع
ولا حد يقول عليا انجرحت
دا العذاب في القلب يدبح
وأنا جامد أوي اندبحت


قولت كفايا يامر سبني
نفسي في يوم احس براحه
في قلبي ليه دايما تاعبني
خلتني أعيش مش مرتاحه

امتي يا ليل هتكون حنون
ومش هأأسي فيك ليله
امتي هتبتسم لي ياكون
وهعيش في دنيا جميله


ولا هفضل طول عمري
أخدني موج عن الفرح بعيد
امتي نور شمس وقمري
يحس بيهم قلبي الوحيد

37 التعليقات:

sun of free dom يقول...

كلمات جمييلة تسلمى يا قمر

سمير الطاهر يقول...

الله الله
كلامك حلو أوى .

كريمة سندي يقول...

جراح الحب تداوى بالصبر على المحبوب

قولت كلام حلم أوي ورقيق

نور مصر يقول...

يا قمر ليه حزين
مش اتفقنا خلاص مفيش انين

اهلا ساسو
ازيك ؟؟
خاطرة رائعة
الايام غالبا فيها لمسات حزن سواء كانت احزان الماضي او مستقبل بس ربنا اكيد معانا ومش بيسبنا وان شاء الله كل ليل ليه فجر قريب
والله اعلم ممكن احوالنا تتغير في ثواني
ان شاء الله الفرح يزورك قريب يا ساسو

المهم ثقتك بلله لازم تزيد كل يوم رغم الاحزان لان املنا الوحيد في ربنا وحدة يقدر يساعدنا في عالم ملائكة بلا قلوب
ــــــــــــــــــ
من أجمل المقاطع

امتي يا ليل هتكون حنون
ومش هأأسي فيك ليله
امتي هتبتسم لي ياكون
وهعيش في دنيا جميله


ولا هفضل طول عمري
أخدني موج عن الفرح بعيد
امتي نور شمس وقمري
يحس بيهم قلبي الوحيد

Malooka Yousef يقول...

الله فى الجووون ياساسو طول عمرك متألقة اعذرينى انى مش بدخل كتير بس الامتحانات بقى وكده يارب تكونى بخير ياقمرة

ساسو يقول...

حياتي (sun of free dom )
انتي الاجمل يا اموره
نورتي الدنيا

ساسو يقول...

صديقي سمير الطاهر
وجودك هو الاحلي سمير
نورت المدونه كلها
دمت بود

ساسو يقول...

الجميله كريمه سندي
انتي اللي رقيقه يا بطتي
نورتيني اوي
وبجد بفرح بتعليقك

ساسو يقول...

صديقي ((نور مصر ))
اهلا بيك نور
انا بخير الحمدلله
مرسي كتير لزوقك

كلماتك زادت الخاطره جمال واشراق
بجد تعليقك مميز جدا
وكتير بيسعد قلبي
ربي يخليك
ودايما منور الدنيا

ثقتي بالله كبيره جدا
واملي فيه كبير
وهو قادر علي كل شئ

بس موضوع الحادثه اللي حصلتلي دي أثرت علي نفسيتي اوي
بس نشكر ربنا علي كل شئ


دمت بكل خير صديقي

ساسو يقول...

العسوله Malooka Yousef
مرسي حبيبي دا بس من زوقك
ورقتك انتي
نورتيني كتير بعد غياب
وعذراكي حبيبي لاني عايشه نفس حالتك
ويمكن اكتر شويه

بحبك يا اجمل ملوكه

beautiful mind يقول...

الله عليكي وعلي كلماتك ياساسو
بجد تسلم ايدك
وعايزن من دا علي طول
بس بلاش حزن بقي
كفاية علينا كدا
تحياتي ليكي ياقمر

بنوتة يقول...

كلامك جميل

تحياتى

الاحلام يقول...

بس الألم دايما كاسرني
والعذاب علطول صديقي
قمه كلمات الاسى والالم ولكن بها انكسار لا احبه ولا احب من اعرفهم يشعروا به مهما يحدث من الم لا يمكن ان يصل الى انه يكسرنى لا فانا اقوى من الالم مهما كانت الظروف او المعطيات
كلماتك مع انها جميله ورائعه لكن فيها الحزن والاسى كثيرا ابقى متفائله حتى نسعد بكى دائما دمتى بكل سعاده تقبلى تحياتى الاحــــــلام

Tamer Nabil Moussa يقول...

كلمات جميلة

تسلمى ساسو عليها


ربنا يوفقك ويكرمك


مع خالص تحياتى

ساسو يقول...

صديقي beautiful mind
الله علي تعليقك ومرورك بجد
ان شاء الله
انت تؤمر والله
نورت الدنيا كلها
خالص تقديري

ساسو يقول...

اجمل بنوته
انتي الاجمل حياتي
نورتيني كتير

ساسو يقول...

صديقي الاحلام
نورت الدنيا كلها بمرورك
وبجد بفرح كتير بتعليقك
وكلماتك بتريح اوي

عندك حق يمكن تكون كلماتي فيها حزن ذياده
بس صدقني دا غصب عني
من يوم ما عملت حادثه وانا الكون كله في عيوني بقي عذاب
بس الحمدلله

وبحاول والله اخرج نفسي من المود دا
بس مش قادره

دمت بكل خير

ساسو يقول...

صديقي (Tamer Nabil Moussa)
تامر منور الدنيا كلها والله
مرورك الاجمل اكيد
الله يخليك يارب
دمت بود

faroukfahmy58 يقول...

ساسو
سلامتك ياساسو من السذاجه والحزن والالم والعذاب والسكات
دا كتير قوى
سيكون الليل ان شاء الله حنون وسيبتسم لك كما ابتسم لمن هم اشد منك معاناة

هيثــم رمضـــان يقول...

السلام عليكم
إزيك يا ساسو أخبارك إيه بإذن الله تكوني بخير.

الكلمات جميله ومنظمه جداً والموسيقي كانت مظبوطه وكمان المعاني كانت جميله.

لكن يا ساسو في جملة حسيت إنها تقيله علي ودني والمفروض تكون أخف من كده وده طبعاً مجرد رأي زي ما قولتلك قبل كده , الجملة هي " وأنا جامد أوي اندبحت" وأقترح البديل يكون مثلاً " وبكل قسوه أنا إندبحت" أو " وبقسوة حبيبي إندبحت"

ساسو إستمري وربنا يوفقك إن شاء الله وبالنسبه إن الخاطره حزينه أو مش حزينه مش ده المهم المهم إنها تكون حلوه ولو إنتي متميزه في اللون ده إكتبي فيه لكن طبعاً مع تنوع الأفكار ,والتنويع عموماً بين الموضوعات مطلوب وإن كان الجانب الحزين يظل القراء أكثر تأثراً به لكن الحزن علي الماضي أو الحاضر لازم يكون معاه أمل في المستقبل علشان نحس طعم الحياه.

مع خالص تحياتي

Beautiful girl يقول...

اشعار رائعة

تحياتى ليكى ساسو

ريــــمــــاس يقول...

قولت أمشي من سكات
وأنا مجروحه بس أخبي
حتي قلبي لو مره مات
أنطق وأقول الذنب ذنبي

؛؛
؛
ساسو
في كل مرة أكون هنا
أجدكِ أجمل "
؛؛
؛
ألف سلامة عليكي يارب
قرأت لكِ تعليق عند إحدى الزميلات
وعلمت بقصة الحادث ألف سلامة
وطمنيني دائماً عليكِ
لروحك عبق الغاردينيا
أختك reemaas

Casper يقول...

الابداع مش جديد عليكي يا ساسو
وبجد اشعارك في غاية الرقة والروعة
مهما قلت فيها مش هوفي حقها

انا قريت بسرعة كان نفسي اقري بتأني واشوف التشبيهات واطلع اخطاء والذي منه :D:D:D:D
لكن الواحد مشغول اليومين دول جدا وبرجع من الشغل متأخر اوي وبفتح النت كل كام يوم كام دقيقة

بجد اشعارك لها مذاق خاص وبصمة مميزة بحيث لما نقرا شعر جميل زي ده وفيه احساس صادق على طول نقول ده شغل ساسو

بالتوفيق ليكي
وربنا يزيدك موهبة

وشكرا على سؤالك

Casper

ساسو يقول...

صديقي faroukfahmy58
الله يسلمك استاذي فاروق
مرسي كتير لزوقك
ومرسي علي الدعوايه الرقيقه دي
بجد بفرح كتير بوجودك
دمت بكل خير

ساسو يقول...

صديقي هيثم رمضان
وعليكم السلام ورحمه الله وبركاته
انا بخير الحمدلله
مرورك هو الاجمل دايما والله
واكيد رأيك يهمني كتير
وبجد انت بتنور الدنيا كلها
وتعليقك دايما يسعد قلبي
دمت بود

ساسو يقول...

الجميله Beautiful girl
انتي اللي عسوله يا بطتي
نورتيني يا اجمل بنوته

ساسو يقول...

حبيبه قلبي ريــــمــــاس
انتي الاجمل حبيبي
مرسي كتير لاهتمامك
انا فعلا عملت حادثه من تقريبا اسبوع ورجلي اتجبست وهقعد في الجبس شهر ويمكن اكتر
واخدت تحت عيني كام غرزه كمان
بس الحمدلله علي كل شئ

الله يسلمك يا اموره قلبي
نورتي الدنيا

ساسو يقول...

صديقي Casper
حمدلله علي سلامتك
الدنيا نورت برجوعك من جديد
يااااه انا استحق كل دا
بجد دا كتير عليا
وانت اللي تستحق اكتر من كده كمان

ربنا معاك ويوفقك في شغلك وحياتك يارب
ههههههههه
هوانا اطول اسمع نقدك يا اسامه
بجد بفرح كتير بيه

دمت بكل خير

سندباد يقول...

لازم نقول ونفضفض عشان نقدر نخرج من الحالة احيانا الكلام بيريح اوي
جميل اسلوبك كالعادة
تقديري واحترامي

ساسو يقول...

صديقي سندباد
عندك حق
الكلام بيريح اوي اوي
يار ايامك تبقي كلها سعاده
نورتني كتير يا سندباد
دمت بود

سواح في ملك الله- يقول...

حيرانة ياساسوا
بين البكا والسكوت والذهاب
كلمات رقيقة ميئةبالالم
من شاعرة رقيقة
تحيتي

أم يقول...

نرجوا المشاركة في حملة الجسد الواحد ليتوحد صف أمة محمد التفاصيل في جانب المدونة وشكرا

ساسو يقول...

صديقي سواح في ملك الله-
نورت المدونه كلها
وبجد فرحت كتير بمرورك

علشان ندوق الحلو لازم ندوس علي المر
بس الحمدلله
الدنيا حلوه بحلوها وبمرها
دمت بكل خير

د.ريان يقول...

مساء العطر ساسو

ويسعدكِ بكل خير ومسرة

كلمات عميقة ومن قلب ورغم رياح

الحزن بقلمكِ بيشرق الامل بقلبكِ

ويارب كل السعادة لكِ

تقبلي أرق تحية ايتها الرقيقة

nanny يقول...

كلامك جمييييل
ياجميييل
الله عليكي

faroukfahmy58 يقول...

ساسو
قلت ابكى ولا حد يسمع
ولا حد يقول عليا انجرحت
دا العذاب فى القلب يدبح
وانا جامد قوى اندبحت
شعر ملئ بالاشجان وفى نفس الوقت يحمل الشموخ والاباء فعظمة المتألم فى تحمل الآلام وسترها عن الانام

الجوكر يقول...

الحب مش لعب وهزار

الحب شوق لهيبه ونار

الحب إحساس ومشاعر

إحساس يخلّى الكون عمار

الحب زوج ودار

الحب يخلّى الليل نهار

الحب مش حزن والم

ولا نبكى بالدموع

ساعه خصام وساعه رجوع

الحب زوج ودار

الحب مش كلام

يترص والسلام

آخر كلامى ياحبيبتى اعزرينى

واوعى يوم من عيونك تحرمينى

...

صديقتى الجميله

ساسو

أبدعتِ كعادتك

وصورتِ ما يجول فى خاطرك

بكل ابداع وسلاسه

مع تمنياتى لكِ بالتفيق


مودتى