Our Blogger Templates Web Design

فى مدونتى المتواضعه ارحب بكل الزوار وكل الاصدقاء وياريت تعجبكم كلماتى البسيطه واشكركم جداااااااااااااااااااااااااااا لتشريفكم

قولت


قولت أتقل عليه
قاللي ارحمي عنيا !
فكرت أسأل عليه
قاللي ابعدي شويه !
أعمل ايه معاه ؟
وأرضيه بأي نوع !
أروح وأبعد وأنساه ؟
هيطلب مني الرجوع
أحبه وأدوب في هواه ؟
هيقوللي لأ ممنوع
كلامه سيف علي رقبتي ....
أصله عندي الهوا
ضحكته هي حبيبتي
كل شيئ يهون واحنا سوا
بصبر كمان عليه
ماهو بيدلع عليا
معرفش أجرح عنيه
بس هو بيجرح عنيا ....
بعدت عنه
بس مش مرتبه لكدا ....
وأرجع اقرب منه !
من غير محيله ولا ندا
هو بقي بيغيب
وبيعذبني كدا معاه
رغم انه الحبيب ....
وعمري كله فداه
بيبعد عني وأنا
بسأل عليه الناس
بتمني يجيلي هنا !
أطمن عليه وخلاص
بعمل بأصلي معاه
منا أصلي مليش غيره
تاعبني جدا هواه !
بس بسيبه لضميره
في قربه بحس الأه ....
بس هأعمل ايه !
في بعده بتبقي الحياه
ملهاش طعم ليه !
حيرني وسهر عيوني
وهو أكيد فرحان
الدموع قتلت جفوني
ولا يوم يكون زعلان ....
أختار ايه دلوني ؟
نفسي قلبي يرتاح
واياكوا تعذبوني !
دا قلبي عايز أفراح

29 التعليقات:

Ramy يقول...

ساسو

اولا أخبار الأمتحانات اية

يااارب تكون عدت بقى و تمام

بالسبة للكلام الحلو اللى انتى كتباه

دة واد رخم قوى على فكره حد يلاقى حد يحبه كده و يعذبه كده

و احنا منقدرش نعذبك و نقولك سوكى علية بالضبة و المفتاح

ده برضه حبيب القلب اللى معاه بنرتاح

طب ماتقوليلوا الحيرة اللى انت قيها ترتاحى وهو كمان يرتاح

كلمات زى العسل يا ساسو

تسلم الأيادى

ربنا يوفقك

hend anwar يقول...

جميلة اوى
تسلم

غير معرف يقول...

ياروح قلبى أنا

دا حب ومكلبش فيكى وباين كدا حب صادق وجميل ومعتقدش انك تقدرى تستغنى عن الحب الجميل دا

هو بيعذبك يمكن يكون شايف تعذيبك راحه ليه ومبسوط بحبه ليكى بالشكل دا
معاكى أنه صعب جداااااااا النوع دا من الحب بس هتعملى ايه بتحبيه وباين عليكى متقدريش على بعده

لو البوست من واقع الحياه الشخصيه يبقه ربنا معاااكى يارب على الحب دا

تسلم ايدك ياقمرايه

كل الحب والخير

ساسو يقول...

صديقي رامي
الحمد لله الامتحانات تمام
باقيلي امتحان يوم الخميس ادعيلي بقي
ههههههههه
أه هو رخم بس مش قوي نص نص كدا هههههه
مرسي علي كلامك الجميل
وبجد نورتني جدا
وشكرا لاهتمامك
ربنا يخليك
تحياتي

ساسو يقول...

الجميله جدا (sun of free dom )
مرسي يا حبيبتي يا قمر
وبجد نورتيني
ومتغبيش عليا كده
دمتي بخير

ساسو يقول...

حبيبه قلبي ( الحب الجميل )
أه والله عندك حق في كل اللي قولتيه
بجد كلامك بيريح قلبي جدا
وبجد انتي حبي الجميل
يا أرق انسانه
تحياتي

love is life يقول...

كلام جميل جدا
عجبنى اوى تسلمى بجد عليه
ومستنى المزيد

موجة يقول...

ساسو
******
يعني دا ذنبي إني كنت خايف ازعجك علشان تعرفي تذاكري.. علشان كده كنت باجي مدونتك من سكات ومابعملش دوشة ههههههههههه
عملتي ايه طمنيني على الامتحانات عملتي فيها ايه وانا عارف انها بتيقى فترة شنيعة مريعة فظيعة بس ربنا يوفقك ياااارب
يارب تكوني حليتي كويس وتطلعي شاطرة زي ابيه احمد.. اللي هو انا ههههه
انا فعلا عاجباني اشعارك أوي
لدرجة اني قعدت افكر مين المطرب اللي يستاهل اني اهديله الكلمات الرقيقة دي علشان يغنيها
وبصراحة مالاقيتش الا شيرين
وانا عارف انك بتحبيها
هههههههههههههه
مش مخابرات والله بس عرفت من صورتها عندك في المدونة
خالص تحياتي
موجة

موجة يقول...

نسيت اقول حاجة ياساسو
ربنا يوفقك في امتحان يوم الخميس
برضه مش شغل مخابرات
عرفت كده من تعليقك على رامي اللي طلع سامي ههههههههه
خالص تحياتي
موجة
احمد

باحث عن حب يقول...

السلام عليكم
والله المقوله فكره من عندى
وممكن ننفذها
موضوع ررررائع بس ده واد رخم قوى قوى
بس الحب عذاب وحلاوته فى عذابه
نفسى اتعذب بس بحنيه
مش واحده
رخمه
كده

Mostafa Ali يقول...

إزيك ساسو

انا لما قرات كلامك الحساس ده قلت لازم اعلق لسببين

لروعة الكلام الناطقة به نبضات قلبك
كلمات معبرة وصادقة منك ساسو

ولأطمئن عليكى وعلى أخبارك
أتمنى تكونى بخير وحب دائما

> انا متابع لموضوعاتك دايما
بس المود ساعات بيخلى متابعتى قراءة بس
حتى مدونتى عايز أكتب فيها جديد ومش مركز

تقبلى تحياتى ...

ساسو يقول...

صديقي (love is life )
أيوه كده خليك منورني دايما
بجد وجودك بيسعدني جدا
ومرسي علي كلامك الجميل
تحياتي

ساسو يقول...

صديقي أحمد ( موجه )
مذاكره ايه بس أنا مكبره دماغي أخر حاجه
أه بذاكر بس ساعات ساعات
ياسلام وأنا بقي هأعرف منين انك بتيجي من سكات
وكمان تعليقك هيعملي دوشه
ليه دأنا والله بفرح جدا بتعليقاتكم الجميله
الامتحانات ياعني كده بس الحمد لله
وعلي رأيك بتبقي فتره شنيعة مريعة فظيعة
أه الحمد لله أنا بعمل اللي عليا والباقي علي ربنا
بس انت بتقول ابيه أحمد
ليه علي أساس اني أصغر منك بعشر سنين
دا فرق السن اللي بينا 3 سنين بس
دا لو كان سنك زي ما انت كاتب بجد ههههه

ومرسي علي مجاملتك الرقيقه
وعادي أعمل مخابرات براحتك يا باشا

يارب يا أحمد وادعيلي لأنه أخر امتحان

خالص احترامي وتقديري

ساسو يقول...

صديقي محمود ( باحث عن حب )
وعليك السلام ورحمه الله وبركاته
يااااه فكره من عندك
لا انت بجد عبقري أوي
واوك ننفذها
بس ياريت الدور مش يكون عليا
بجد نورتني جدا جدا جدا
وعلي رأيك يا محمود اجمل ما فيه عذابه

يارب يا محمود كل اللي بتحلم بيه يكون من نصيبك

تحياتي

ساسو يقول...

صديقي أسباني
أنا تمام الحمد لله
لا لا لا مش قادره أصدق
أخيرا جيت
حمدلله علي سلامتك
مرسي بجد علي كلامك الرقيق
ومجاملتك الجميله جدا
ومرسي لاهتمامك بجد انت زوق أوي

يارب يا صديقي يبقي مودك دايما تمام
علشان تيجي تنورني دايما بتعليقك
وعلشان تكتب جديد في مدونتك
لأن كل جديدك رائع جدا

تحياتي

الشاعر الفنان أحمد فتحى فؤاد يقول...

ساسو

أجمل حاجة فى كتاباتك إنك بتكتبى اللى إنتى عايزاه و حاساه بالشكل اللى يرضيكى و يسعدك و يسعدنا

دمتى بألف خير

ساسو يقول...

الشاعر الفنان احمد فتحي فؤاد
الله يخليك علي مجاملتك الرقيقه اللي بجد أعتز بيها جدا
نورتني يا شاعرنا الموهوب
تحياتي

داليـ ـ ـ ـ ـ ـ ــــا يقول...

من كتر حبى فيك

مش عارف إإإإيه يرضيك

دى الكام كلمه اللى جم على بالى لما قرئت كلامى

هو الحب كده ياساسو بتبقى عايزه تعملى المستحيل عشان ترضيه

تحياتى

ساسو يقول...

الجميله داليا
صباحك جميل ياقمر
نورتيني جدا
وبجد بفرح جدا بوجودك الرقيق

وأه يا دولي هنعمل ايه بقي
تحياتي

عادل الألفي يقول...

جميلة أوي بجد يا ساسو

وبعدين سيبك من هواه .. وروحي لهوا شرم .. هناك هتقولي الأه .. من غير عذاب ولا جرح

;)

بلقيس يقول...

صباح الورد ساسو


سامحي تقصيري
والله حروفك معزوفة
تحفة تحفة يابنت
بس كاسرني خاطري عليك
لانو عذابك واضح
دائرة ملهاش حل
ربي يعينك ويعين كل عاشق
بجد احب اطل عليكي
لك كل الشكر والتقدير

ساسو يقول...

صديقي عادل الالفي
بجد مدونتي نورت جدا بمرورك
بجد مرسي جدا
ههههههه
اكيد هوا شرم يجنن
بس انا في هوا اسكندريه اكيد جميل ولا ايه

دمت بكل خير

ساسو يقول...

الجميله بلقيس
نورتيني يا حبيبه قلبي بجد
ومكانك محفوظ برغم تأخرك
مرسي جدا علي كل كلمه
بجد قلبي فرحان جدا بوجودك الطعوم

تحياتي

عادل الألفي يقول...

أكيد لازم يكون جميل .. فكل ما يكفيه أنك تكوني بجواره .. ليزداد عبيره رونقًا .. وسحره تألقًا
;)

ساسو يقول...

صديقي عادل الالفي
مرسي جدا لزوقك
وبجد بجد وجودك بيسعد قلبي جدا
وبجد منورني أوي

دمت بخير

modcena يقول...

السلام عليكم

عزيزتى ساسو بجد جميلة جدا ومتالقة


قولت أتقل عليه
قاللي ارحمي عنيا !
فكرت أسأل عليه
قاللي ابعدي شويه !
أعمل ايه معاه ؟
وأرضيه بأي نوع !
أروح وأبعد وأنساه ؟
هيطلب مني الرجوع
أحبه وأدوب في هواه ؟
هيقوللي لأ ممنوع

ايه الحيرة دى بس
بس جميلة
تحياتى يا نجمة

ساسو يقول...

صديقي محمود قلماوي

مرسي جدا لزوقك
أه أنا معاك هي حيره أوي
بس هعمل ايه
اللي بيعرف انه غالي عند اي شخص بيدلع عليه براحته
تحياتي

Malooka Yousef يقول...

اصعب حاجه تحبى حد ويعبك كده بس اكيد ع قلبك زى العسل ومدام بتحبيه هتحسى انك قابله ده بس عاجبنى طريقه الكتابة اوى

تسلمى ياقمر

ساسو يقول...

حبيبتي ملوكه
اه عندك حق
نورتيني يا عسوله جدا
ومرورك رقيق جدا
ربي يبارك فيكي